زامان ترسینه دولاندی

کوله بوغولدی اوجاغیم!

آلووسوز، تویتوسوز یاندی

ائلیم، اوبام، داشیم، داغیم

قاراداغیم!

چالخالاندی غم دنیزی

طوفاندا قویدولار بیزی

بلا آلدی اوستوموزو

نه نیشانیم ، نه مایاغیم

قاراداغیم!

قوللو، قانادلی قیریلدیق

دیری-دیری باسدیریلدیق

منیم ایگید، قوچاغیم

قاراداغیم!

ماتمینه گولن ده وار

اوره یی سوکولن ده وار

سیناییرام دیار-دیار

کیمدی آرخام، کیم اورتاغیم

قاراداغیم!

زامان یاتمادی یاتیما

غم النمیش حایاتیما

دومان کوچوب بایاتیما

کدر یاغیر قوشام، آغیم

قاراداغیم!

"دیل غمی"نه قوربان اولوم

"کرمی"نه قوربان اولوم

المینه قوربان اولوم

منیم سوز، صنعت اوجاغیم

قاراداغیم

اود دوشسه ده بینووره نه

داغ چکسه ده سینه نه

قالخاجاقسان یئنه یئنه

آی منیم آنا تورپاغیم

قاراداغیم

قاراداغیم