آراز، اورمونو قورتاراجاق مي؟
آراز آذربايجانا حسرت و هيجران نماديدي. آذربايجان آشيق، شاعير و يازيچيلاري بو چايدان سؤز آپاراندا حسرتلرين گيزلهده بيلمهييبلر. بو چاي چئورهسينده اولان قورو چؤللره، دريسي گونده قوورولان اكينچيلره ياشاييش باغيشلاييرسا دا، هئچ زامان او تا ـ بو تايدا يئرلشن ميللت اوچون سئوينج و شنليك قايناغي اولانماييب.
آراز سولطاندي. ساوالانا تاي سولطان. آمما بو ايكي سولطانليق آراسيندا بير بويوك فرق وار. ساوالان بير دؤيوشچو و مباريز سلطاندي. بير سولطان كي دوشمنلريندهن اينتقام آليب، ايگيدليگ و وطن سئورليك درسي وئرير. آمما آراز بير ظاليم سلطاندي. بو سولطان قان تؤكوب، گوناهسيزلاري بوغماقدان ساوايي بير ايش باجارمير.
آذربايجان فولكولوروندا آرازا علاقهدار چوخلو شعرلر، حيكايهلر و افسانهلر يارانيب. بونلاردان بيري آراز شعريدير. بو شعر اينديليكده آيري شكيللرده اوخونورسادا بيز اوشاقليقدا ائشيتديييميزي گتيريريك:
آراز آراز خان آراز
سولطان آراز خان آراز
سنی گؤروم یاناسان
بیر دردیمی قان آراز
آراز سندن کیم كئچدی
کیم غرق اولدو کیم كئچدی
فلک گهل ثابیت ائیله
هانسی گونوم خوش كئچدی
آرازی آییردیلار
قومونان دویوردولار
من سندن آیریلمازدیم
ظولم ايله آییردیلار.
آمما گؤرهسن آرازا اولان آجي باخيشلار دؤنهجكمي؟ منجه بو باخيش دهييشيكلييينه ايمكان وار. آذربايجان ايندي بير كؤنلو سينيق اينسانا بنزهيير. بير اينسان كي اورهيي ايشدهن دوشمك حاليندادير. دئديم اورهيي، چونكي دوغروداندا اورمو گؤلو آذربايجانين اورهييدير. آذربايجانين حيات و ياشاييشي بو گؤلون ياشاييشينا باغليدي. بو گؤل قورويورسا، آذربايجان بير پوزولموش قادينا اوخشاياجاق. بير قادين كي بوتون وارـ يوخون الدهن وئريب و ياشاماق اوچون هئچ ندهني يوخدور.
ايندي آرازين قاباغا يئريمهلي زامانيدير. ظره گلير آراز بئلهنچي بير زامان اوچون يارانميشايميش. بو آراز اوچون بير فورصتدي، بلكه اونا باغلي اولان چيركين باخيشلاردا دهييشيكليك يارادا. بو دا اولا بيلمز مگر بو كي آذربايجانين يارالي كؤنلونه مرهم قويا. آذربايجانين اؤلوم حاليندا اولان دوزلو گلينينه تازادان ياشاييش باغيشلايا.
بو ايستك بؤيوك ايستك اولورسادا، ايمكانسيز دئييل.
احمد حسن نژاد ارزیل