سوناي، سئوگي لر گونو

سوناي گئجه سي، آزربايجاندا ابدي سئوگي گونودور. بو گئجه و بو گون باشقا كولتورلردن گلن والنتاين گونويله برابر دير. شهريورين 31 جي گونو سوناي گونو و گئجه سي بيز آزربايجانلي لارين طرفيندن " سئوگي لر گونو " عنوانيندا گوتلانيب، بو گون اؤز سئودييميزه بير هديه آلماق لا بو گونو داها آرتيق يادلارا سالماق اولار.

« سوناي » يا همان « سون آي » يايين آخيرلاريندا سون آيلي گئجه لرده چياخان آيا دئييلير. بو زامان اكين دريولوب، خيرمن لر ييغيلار آما هله پاييز دوشمه ميش اولار. بو گئجه آي لا گونش 180 درجه زاويه ده اوزله شيرلر. دئمك اولار بونلار بير بيرلر ايله اوز اوزه قاليب، بير – بيرينين اوزون بوتون گؤرورلر. آنجاق بو گؤرمه چوخلو تله سيك حالدا اوز وئرير.بئله كي پاييزين اعتدالي اولدوغونا گؤره گئجه و گوندوز برابر ديلر. بو گئجه سانكي آي ايله گون گيزلن پانج اويناييرلار. بيري او بيرسينه چاتماق ايسته يير آما چاتا بيلمير. سانكي آي گونشين آرديجا قاچيب آما يئتيشه بيلمير. آي بئله ليك له اسطوره لر ده سئودالانير. ائله اولور كي خالقي دا سئودالانديرير. خالقين سئودالي گؤزلرينده آيين دولاشيغي داها سئودالي گؤروشور.

سونايين سوداسي سونسوزدور. بلكه ده ابدي تيكرارلانان بير سئودا دير. هر ايل بير تاپماجا كيمي، بير گيزلن پانج كيمي تيكرارلانير.

بو گؤزل دوشونجه آزربايجانين ان اسكي دوشونجه لريندن دير و اونون ياشي ايسلام دان قاباغا يئتيشير. هله ده بعضي كندلر ده ائله اسكي چاغلارا تاي بو گئجه ييغيشيب، اويناييب و بوتون آيين سئوداسين قوتلارلر.

بو گونون هديه لري بير گول و يا هر عشق معناسي وئرن بير هديه اولا بيلر. سونايين هديه سينده آي دان بير اثر اولورسا، داهادا گؤزل اولار.