آذربایجان توپراغی یام

آذربايجان توپراغي يام

بو داغ منيم اؤز داغيم دير

من بو داغين بوداغي يام

چمنينده كؤزه دؤنموش

شؤعله لنميش چيراغي يام.

 

بو داش منيم اؤز داشيمدير

اؤز تاريخيم اؤز ياشيمدير

قايا مغرور قارداشيمدير

اونون سسي سوراغي يام.

 

بو يول منيم اؤز يولومدور

او تاي- بو تاي ساغ سولومدور

خزر سينم، كور قولومدور

خان آرازين فراغي يام.

 

سئچمه لي يم توكدن، توكو

آغيردير چيينيمين يوكو

كؤكوم دده قورقود كؤكو

قاراج اوغلان بولاغي يام.

 

 دئمه سينلر گلدي- گئدر

كئچيرمه رم عؤمور هدر

اؤلنده ده قلبيم قدر

آذربايجان توپراغي يام.

(زليم خان يعقوب)

اوروجلوق آیی

مبارک اوروجلوق آیی­نین یئتیشمه ­سینی بوتون وطنداشلارا، قلمداشلارا و موسلمانلارا تبریک دئییر، معنوی اوغورلار دیله ­ییر و هامی عزیزلردن خیر دعا اومورام.

حؤرمتله : اکبر حمیدی علیار

 

اوروجلوق آیی

اي كؤنول غفلتده ياتما دوركي قالخماق واختي­دير

جان قوشون معنا سماسيندا بوراخماق واختي­دير

 

بير اووشدور گؤزلرين قوي ييرتيلا اؤرتوكلري

وارليغا، دونيايه آيدين گؤزله باخماق واختي­دير

 

عيبي يوخ گر اشتباهلار، سهولر تونقاللاشيب

توبه آدلي كيبريتي تونقالدا چاخماق واختي­دير

 

جان بويانميش جوربه جور سولغون، ياراشماز رنگلره

حق بوياغين بو بوياقلار اوسته ياخماق واختي­دير

 

دوم-دورو سو قالسا گر بير يئرده بيرگون كيفله­نير

دور چاليش، آختار، ايز آچ دريايه آخماق واختي­دير

 

شوق ايله بير سيلكه­لن، روحين ده قوي يونگوللشه

دارجا كؤهنه­لميش قابيغدان ايندي چيخماق واختي­دير

 

يول اينام، مركب عمل، مين سورگونن قالما دالي

معرفت بايراغين ،اوغلان، عرشه تاخماق واختي­دير

 

یالله "علیار "واخت كئچر، گؤزله قاچيرما فرصتي

قاچ كي نور كرواني يوللاندي.. قاريخماق واختي­دير.